LA UNION – Lalo pay a nairutan iti quaritine check point kadagiti poultry products ti Provincial Veterinary Office tapno saan a makaserrek ti birds flu ditoy probinsya ti La Union.
Sigun kenni Dr. Pepito Estrada ti La Union Provincial Veterinary Office, ipatpatungpalda ti “no proper documents, no entry policy” kadagiti maibibiyahe a poultry products rummuar wenno umuneg iti probinsya.
Saanda nga ipalubos a mailabas wenno mailako iti uneg ti probinsya ti aniaman a poultry products uray dagiti livestock nga awanan ti veterinarian health certificate ken veterinarian shipment permit.
Agpatpatnag nga adda ti provincial veterinarian a nakabantay kadagiti tallo a kangrunaan a pagnaan iti probinsya ti La Union tapno agmonitor.
Kabayatanna, no kadagiti dadduma a pagtagilakuan ket nakapsot iti panaglakuan kadagiti karne ti manok, agkurkurang met iti suplay ditoy syudad ti San Fernando, La Union.
Sigun kenni Gloria Gadia, presidente ti chicken meat vendors association iti San Fernando City Public Market, agapaman a ngimmato iti presyo ti karne ti manok iti merkado gapu ta bassit ti suplay daytoy.
Nairot kinunana, ti ar-aramiden nga inspeksyon kadagiti karne tapno maipanamnama a natalged daytoy a kanen dagiti umili.
Iti laksid nga adda avian flu scare kadagiti dadduma a probinsya ket impanamnamana a nasalun-at dagiti manok a maparparti kadagiti poultry farm ditoy La Union a mailaklako kadagiti palengke.
