LA UNION – Nasurok 6,000 a lugan ti natiliwan ti Land Transportation Office iti umuna a sangapulo ket lima nga aldaw idi Hunio bayat a pinapigsa ti ahensia ti pannakaipatungpal ti ‘No Registration, No Travel Policy’ ditoy pagilian.
Segun kenni Chief Assistant Secretary Opisina ti Land Transportation Office a ni Atty. Vigor Mendoza, agtultuloy ti operasionda nga agserbi a palagip kadagiti motorista a mangirehistro kadagiti luganda.
Binallaaganna pay dagitoy a mabalin a mamultada ken posible a mai-impound ti luganda no matiliwda.
Maibasar iti datos ti ahensia, manipud Hunio 1-15, 2024, 6,064 motorista ti natiliwan, 5,470 ti naikkan iti violation ticket bayat a 981 ti na-impound.
Iti agdama, agtultuloy ti nainget a panangipatungpal ti LTO iti nadakamat a polisia tapno masigurado ti kinatalged dagiti amin a drivers ti lugan ken tapno malapdan ti aniaman a aberya iti kalsada.
