Pinaregta ti National Privacy Commission ni Bicol Saro Party-list Representative Terry Ridon a pormal a mangipila ti maysa a reklamo iti opisinada kontra kenni Senador Jinggoy Estrada gapo iti maysa nga insidente a napasamak iti social media.
Nagpost iti senador ti maysa a yearbook photo ni Ridon kadua ni sigud a Bulacan Assistant District Engineer Brice Hernandez babaen ti social media account na.
Segun kenni Representative Ridon, naglaon ti personal nga impormasyon iti inpost ni Estrada kas iti sububukel a nagan na, eksakto nga aldaw ti panakaipasngay na, numero ti telepono, ken iti address ti balay ti lolona. Banag a makapadanag la unay gapo iti sensitibidad ken potensyal a panagaramat iti saan nga otorisado a wagas.
Pinasingkedan ti National Privacy Commission a dagiti detalye a dinakamat ni Ridon ket maibilang kas personal nga impormasyon a sagudayen ti Data Privacy Act nga addaan ti katupag a pannusa kas iti panakaibalud ti maysa agingana tallo a tawen ken multa a dumanon ti ₱500,000.
Maysa met isuna a public official isuta mabalin isuna a makasango ti nadagdagsen a pannusa kas iti temporario wenno permanente a panaka-diskualipika manipud iti pampubliko nga opisina, tapno masigurado nga dagiti opisyal ket addaan ti accountability kadagiti aksion da ken sursuruten iti linteg.
Impaganetget pay ti komisyon nga uray ikkaten wenno i-takedown ni Senador Estrada iti nasao a post, adda latta ti karbengan ni Representative Ridon a mangipila ti kaso kangrunaan no mamati isuna a naagrabyado wenno nadadael.###
