LA UNION – Isagsaganan ti pulisya ti kaso laban iti maysa nga overseases Filipino worker (OFW) a naaresto iti naisayangkat a raid iti uneg ti balayna gapu ti maipagarup a panagikotna iti droga idiay Barangay Paringao, ili ti Bauang, La Union.
Nabigbig ti suspek a ni Jefferson Caccam, 36-anyos, residente ti nasao a lugar.
Naammuan ti Bombo Radyo manipud iti Bauang Police Station, karaman ti suspek iti watchlist dagiti drug personality iti headquarter ti Philippinen National Police (PNP).
Babaen ti bileg iti search warrant ket inalikad dagiti pulis ti balay ti nasao nga OFW ken nakompiskar manipud iti uneg daytoy ti dua a sachet ti marijuana ken dua a sachet ti shabu.
Nagkedked met nga agsarita ti suspek maipapan ti pannakatiliw daytoy.
