LA UNION – Uray no addan iti salwad ti embahada iti Pilipinas ti Filipina Domestic Helper a naglibas manipud iti amona idiay Abu Dhabi ket agdandanag pay laeng iti pamilyana nga agnanaed idiay Barangay Dallangayan Este, syudad ti San Fernando, La Union.
Iti pannakiuman ti Bombo Radyo kenni Mario Rivera, ama ti nasao nga overseases worker a ni Gretchen, kinunana a sumagmamano a lawasen a saan pay a timmawag ti anakna kaniada.
Base iti kauddian nga impormasyon a maaw-awat ni Mang Mario manipud iti kabagyanda iti nasao a pagilyan ket addan idiay embahada ni Gretchen ngem nakaro pay laeng iti panagdanagda agingga a saanda a makasarita daytoy.
Inyestoria pay ni Mang Mario a naglibas ti anakda gapu iti panangdangran ti amona.
Kalpasan iti sililimed a panaglibas ni Gretchen ket maysa nga Indian national iti nagdisnudo a tumulong kenkuana a nangitulod idiay lugar ti kabagyanda kasaruno iti panagturong idiay embahada tapno agpaarayat.
Kabayatanna, inton aldaw ti Lunes ket kadduaen met ti Bombo Radyo ni Mang Mario idiay Overseases Worker Welfare Administration tapno ammuen ti pudno a kasasaad iti anakna nga adda iti nasao a pagilyan.
