LA UNION – Dead on the spot ti maysa nga overseas Filipino worker (OFW) kalpasan a pinaltogan dagiti agtatakaw a nangserrek iti balayda idiay Barangay Duplas, San Juan, La Union agarup alas-8:40 idi rabii.
Nabigbig ti biktima a ni Edgar Ursua, 33, residente ti nasao a lugar.
Naamuan ti Bombo Radyo manipud iti asawa ken kakadua iti balay ti biktima, a maturogda koman idi simrek ti tallo a lallaki a nakabonete ken nakaimet iti paltog.
Pinang-or met ti maysa kadagiti suspek iti paltog ti OFW ken binalkotna iti packaging tape ti rupa ti biktima kasarunno ti panangalikadda kenkuana iti ruar ti pagtaengan.
Binilinda nga agpakleb ken ginalutanda pay iti packaging tape ti misis ken uppat a kakadua ti mister iti balay.
Ditoy nga innala dagiti suspek dagiti cellphone dagiti biktima ken ti kuarta ti nasao nga OFW nga aggatad iti P100,000.
Sakbay a naglibas dagiti suspek babaen ti motorsiklo ket pinaltoganda ti suspek.
Kabayatanna, iti inisial nga imbestigasion ti San Juan Police Station, maysa a shotgun ti maibagbaga a naaramat iti pammaltog.
Maibasar iti salaysay dagiti karruba ti biktima, sakbay ti insidente ket nakangngegda iti panagtaol dagiti aso kasaruno ti kanalbuong ti napigsa a putok ti paltog.
