(Update) LA UNION – Nagkamangen idiay embahada ti Pilipinas a nakabase idiay Hong Kong dagiti overseases Filipino workers (OFW) nga apektado ti pannakaitantan ti flight tapno agkiddaw ti tulong tapno mai-refund dagiti nagatangda a tickets manipud iti Peya Travel Agency.
Iti pannakiuman ti Bombo Radyo kenni Pearly Ancheta-Rondina, maysa kadagiti OFW nga apektado iti palpak a ticketing system ti Peya Travel Agency, kinunana a saanda a masegurado no kaano a maisubli wenno isubli pay ti nasao nga agency ti ingatangda a tickets.
Immasedegdan iti embahada ti Pilipinas tapno agpatulong a maisubli dagiti kwartada ken makaawiden dagitoy iti pagilyan sakbay ti panagrambak ti Paskua.
Iti istorya pay ni Rindon, maladingitan met isuna gapu ta saanna a makaddua iti noche buena ti pamilyanna nga adda idiay ili ti Bacnotan, La Union.
Naammuan a malaksid kadagiti Pilipino ket adu pay iti dadduma puli a nakarurod ken nakasangit gapu iti pannakaitantan ti flight dagitoy.
Kabayatanna, iti bukodda a Facebook Page ti Peya Travel Agency ket agkidkiddaw dagitoy iti dispensar kadagiti Pilipino a paawid koma ditoy Pilipinas ken inaklonda ti responsibilidad iti pannakataktak dagiti kliyente. (Absalom Flores)
