LA UNION – Maladingitan dagiti Overseas Filipino Workers idiay Hongkong apaman a nadamag da ti napasamak ken ni Rozeny Diane Acosta, a nag-suicide idi Abril 13,2024.
Daytoy ti inbatad ni Bombo International News Correspondent Emily Miranda iti pannaki-uman kenkuana ti Bombo Radyo La Union.
Segun ken Miranda, saan a ni Acosta ti immuna a nai-report a nagpakamatay idiay no sadinno a saan na nga inekspektar a maaramid ni Acosta a keltayen na ti biag na.
Kunana, a ni Acosta ket maysa pay a modelo iti bado ken makisalsalip pay iti pageant idiay Hongkong.
Nu pay saan a masinunuo ni Miranda ti puon ken gapu ti pinagpakamatay ni Acosta ket inpasimudaag na nga adda posibilidad a gapu ti depresyon.
Naammuan pay a nagusar ti biktima ti leather belt tapno agbekkel iti uneg ti comfort room.
Kabayatanna, inbatad pay ni Miranda a mannarimaan ti panaguray da iti autopsy result ti bangkay ni Acosta kas paset ti imbestigasyon.
Maipalagip nga immunan nga inpasigurado ti Overseas Welfare Worker Administration nga adda ti maala ti pamilya ni Acosta a pinansyal a tulong manipud iti nasao nga opisina, iti agency na ken iti employer na.
