Impasigurado ti Bureau of Customs (BOC) nga agtaltalinaed a normal iti panagsangpet dagiti oil shipments ditoy pagilian ken awan pay ti nairekord a kanselasion, segun kenni Commissioner Ariel Nepomuceno.
Nupay kasta, napaliiw a kaaduan kadagiti shipments ket naipatulod sakbay a timpuar ti tension idiay Middle East ken 14 aginggana 20 nga aldaw iti panagbiahe, isu a posible a maapektaran ti suplay kadagiti sumaganad a lawas no kumaro iti sitwasyon.
Nangbuangay ti ahensia iti task force para iti inaldaw a panangmonitor kadagiti imported petroleum products tapno dagus a maamuan ti aniaman a kanselasion wenno pannakataktak.
Iti agdama, awan pay ti nakansela nga oil shipment, ngem naapektaran dagiti sumagmamano nga imported goods. Naibilin metten ti pannakapapartak ti pannakaproseso ken pannakairuar dagiti naipatulod a lana tapno dagus a makadanon iti merkado.###
