Kinarit ti Korte Suprema ni Ombudsman Jesus Crispin Remulla a pormal a mangisubmitir ti reklamo ken ebidensia a mainaig iti alegasionna a maipagarop a partiality, misconduct ken corruption iti hudisial a sistema.
Kasaruno daytoy kadagiti imbaga ni Remulla iti panagdengngeg ti Senate Committee on Finance mainaig iti gakat a 2027 budget ti Office of the Ombudsman, no sadino a dinakamatna iti maipagarup a pannakataktak ti justice system ken dagiti kaso nga imbasura ti Ombudsman nga idi agangay ket binaliktad ti Court of Appeals.
Segun ti Korte Suprema, serioso daytoy a tinutukan dagiti alegasion kontra kadagiti judges ken mahistrado, ngem mabalin laeng daytoy nga agtignay no adda ti pormal a reklamo, umdas nga ebidensia, ken gundaway nga agpalawag dagiti akusado.
Impaganetget ti SC a saanda a mabalin nga agtignay kadagiti alegasion kontr iti maysa a sibubukel nga appellate court a maibasar laeng kadagiti waragawag iti publiko.
Iti sabali a bangir, bigbigen ti Korte Suprema iti kalintegan ti nawaya a panagrakurak, karaman iti panangbabalaw kadagiti korte ken dagiti pangngeddengda, ngem masapul nga idalan iti umno a proseso dagiti seryoso nga alegasion tapno masigurado iti patas a pannakarisut dagitoy.###
