BR LA UNION – Rinugyanen ti Office of the Ombudsman iti preliminary investigation iti maipagarop a biddut a pannaka-usar ti confidential fund ti Office of the Vice President ken Department of Education (DepEd) iti sidong ni Vice President Sara Duterte.
Nagramot iti imbestigasyon ti Ombudsman iti insumite a Committee Report ti House Committee on Good Government and Public Accountability nga indaulwan ni Representative Joel Chua, iti opisina ti Ombudsman.
Dinutukan ti Ombudsman kas “nominal complainant” iti agultuloy nga imbestigasyon ni Rep. Chua kas pannakabagi ti nasao a komite.
Malaksid kenni VP Sara, kabilang dagiti nainaganan a respondent iti reklamo ken nabilin nga agsumite ti counter-affidavits ket dagiti lima nga opisyal ti DepEd nga isuda special disbursing officers Edward Fajarda ken Gina Acosta; assistant secretary Sunshine Charry Fajarda, director for Strategic Management Office; retired Maj. Gen. Nolasco Mempin, undersecretary for Administration ken Annalyn Sevilla, undersecretary for Finance Service.
Naimandar pay nga agsumite ti counter-affidavits na dagiti uppat nga opisyal ti OVP kabilang iti chief of staff ni VP Sara a ni Usec. Atty. Zuleika Lopez, assistant secretary and assistant chief of staff Lemuel Ortonio ken isuda Lt. Col. Dennis Nolasco ken Col. Raymund Dante Lachia ti Vice Presidential Security and Protection Group.
Idi kalman, kinumpirm ti OVP a naawat dan iti order manipud Ombudsman a sumungbat iti reklamo ti Kamara nga adda pakainaigan iti maipagarop a naanomalyan a pananggastos ti confidential fund.
Ngem inlawlawag ti tagapagsarita ti House of Representatives a ni Atty. Princess Abante idi Biyernes a maipagarop a saan a complainant ti Kamara iti kaso kontra iti Bise Presidente idiay Office of the Ombudsman.
Kinunana a mabalin nga agtigtignay ti Ombudsman iti report ti komite nga inadaptar ti Kamara a mangirekomendar iti pannakaipila ti kaso kontra iti Bise Presidente, ngem inlawlawagna a saan a nangipila ti Kamara iti reklamo.
No saan a reklamo daytoy, dinamag ni Ombudsman Samuel Martires no apay a nangipaay ti Kamara ti kopya ti report ti komite iti imbestigasionda kadagiti alegasyon kontra kenni VP Sara.
Kinunada a naawat dan daytoy isunga saanda a tugawan ngem ketdi isuda mismo ti mangimbestigar iti reklamo.
