LA UNION – Maipariten ti online selling kadagiti taraon a karne, frozen, processed ken amin a klase ti meat-by-products idiay Rosario, La Union.
Maiyannurot daytoy iti Executive Order No. 53, Series of 2020, a pinirmaan ni Mayor Bellarmin ‘Larry’ Flores.
Naballaagan met dagiti online sellers, a siasinuman kadagitoy ti matakwatan nga aglabsing iti nasao nga Executive Order ket agsungbat ken makaswan ti violation to Food Safety Act of 2013.
Nairanta ti pammilin tapno protektaran ken masiguro ti natalged a salun-at dagiti umili idiay Rosario, La Union kontra iti kabarbaro nga strain ti swine flu.
Balakad ti lokal a gobyerno ken iti National Meat Inspection Service (NMIS) kadagiti consumers a gumatang laeng iti karne ti baboy iti merkado publiko.
Palagip pay ti NMIS kadagiti consumers a kitaen a naimbag ti naggapuan dagiti gatangen a karne tapno maliklikan ti anyaman a sagubanit.
