BR LA UNION – Ni Opal Suchata Chuangsri ti Thailand iti nakaiyawid ti titulo a Miss World para iti maika-72 nga edisyon ita a tawen.
Naisayangkat ti coronation night iti HITEX Exhibition Centre idiay Telangana, India, idi rabii, May 31.
Maibilang a betarano iti beauty pageant ni Opal agsipudta isuna met laeng ti nangibagi ti Thailand iti Miss Universe 2024 pageant, ken nangabak a third runner-up.
Nagpannuray iti pintas ken laing ni Opal kadagiti 108 a kandidata manipud naduma-duma a paset ti lubong, a pakaibilangan ti pambato ti Pilipinas a ni Krishnah Gravidez a maysa kadagiti Top 8 finalists.
Kabayatanna, first runner-up ni Miss Ethiopia – Hasset Dereje Admassu;
Second runner-up ni Miss Poland – Maja Kladja;
Third runner-up ni Miss Martinique – Aurelie Joachim, a nag-top iti America and Carribean continental group.
Maysa a “blue crown” iti impasa ni Miss World 2024 Krystyna Pyszkova ti Czech Republic iti baro a Miss World a ni Opal.
