LA UNION – Maiganwat iti Operation Libreng Kugit idiay Rosario, La Union babaen ti Municipal Health Office inton Abril 5 agingga 16, agdama a tawen.
Maisayangkat daytoy iti Rural Health Unit – Family Planning and Birthing Clinic idiay Government Center, Poblacion East, Rosario, La Union.
Iyaw-awis daytoy ti lokal a gobyerno kadagiti amin nga ubbing a lallaki nga agtawen ti 10 agpangato a saan pay a nakugit.
Kabayatanna, tinaripnong idi kalman ni Rosario Mayor Bellarmin Flores dagiti 33 a barangay kapitan agraman barangay secretaries ken health workers tapno talantanen dagiti naduma-duma nga aktibidad ken programa a maiganwat ita a bulan ti Marso.
Maysa a natalantan ket iti panangiyuswat ti nasao nga ili iti Executive Order No. 3, series of 2021 wenno panagpa-rehistro iti NAPANAM QR Code.
Malaksid dayta, naipaganetget kadagiti barangay officials iti pannakaisayangkat ti Barangay Assembly, a mangrugi inton Marso 13, maiyannurot iti Proclamation No. 599 series of 2018.
Iti tema ti Barangay Assembly ita a tawen ket “BarangaYYan: Barangay at Mamamayan, Sama-sama at Mag-kaisa Upang Labanan ang Pandemya Tungo sa isang Ligtas, Maayos at Maunlad na Pamayanan”.
