Impaganetget ni NBI Director Jaime Santiago ti nabirngasan kas “Oplan Romanov” ket seryoso a pangta kontra kenni Presidente Ferdinand “Bongbong” Marcos Jr. ken ti pamilya na, a saan a kenni Bise Presidente Sara Duterte.
Segun kenni Santiago, immunan a nadakamat ni Davao City Mayor Baste Duterte iti termino iti maysa a rally idi Enero 2024, nu sadinno ket pinangtaan na iti Presidente a sakbay a maturog ket panunoten na iti napasamak kadagiti Romanov, Tsar wenno lider iti Russia idi naka-monarkiya da pay.
Naklaat iti opisyal idi nagsukat iti naratibo ti vlogger a ni Princess Maui, a nagkuna a ti “Oplan Romanov” ket naipamaysan para ti pamilya Duterte.
Iti naangay nga impeachment trial idi Martes, dinamag iti defense panel member a ni Atty. Mark Vinluan iti testigo a ni NBI Regional Director Jeremy Lotoc nu nangngegan nan iti “Operation Romanov,” ket insungbat na a nangngeg na daitoy kenni Baste Duterte.
Ti “Romanov” ket nagtaud iti royal clan ti Russia a nangidaulo manipud pay maika-17 siglo agingga a pinatay ida dagiti komunista tawen 1917.
Kabayatanna, kinuna met iti defense team a mangidatag da iti testigo tapno paneknekan iti mapapati nga “Operation Romanov” kontra kadagiti Duterte.
Laksid kadagiti nagduma a bersyon, agtaltalinaed met a saritaan nu kasatno a talaga iti “Operation Romanov” ken nu sino dagiti target na a patayen.
