LA UNION – Mabal-balkot ti buteng dagiti Overseas Filipinos idiay Israel nangruna dagiti adda iti asideg ti war zone idiay Gaza.
Ngem iti laksid ti trauma a mapas-pasaran dagiti Overseas Filipinos gapu kadagiti mang-mangegan da a panagbettak ken napipigsa a kanalbuong a gapwanan dagiti bomba, an-anusan da ti agtalinaed ti nasao a pagilian, para iti pamilya da ditoy Pilipinas.
Daytoy iti emosyunal nga impaganetget ni Bombo International News Correspondet Marylyn Valencia kabayatan ti interview ti Bombo Radyo La Union kenkuana.
Kinuna na, nga iti napalabas nga uppat agingga ti lima nga aldaw, nagtalinaed dagitoy iti maaw-awagan a MAMMAD wenno safe place iti balay ti employer na, idi kangitingitan ti airstrike ti Israel idiay Gaza.
Iti agdama, dandani inoras pay laeng a makang-kangngeg da ti uni ti sirena a senyal nga aglemmeng dagitoy gaputi pangta ti bomba.
Immapela ni Valencia iti kararag tapno malpasen ti riribok idiay Israel ken agtalna metten iti panunot ken rikna da kabayatan ti panagtalinaed dagitoy iti nasao a pagilian.
