Naluktan manen ita nga aldaw ti maysa a merkado a paglakuan iti presko ken makabael a nateng manipud Benguet ditoy Brgy. Madyegdeg, Siudad ti San Fernando, La Union, iti abay a mismo ti station ti Bombo Radyo La Union.
Dagiti produkto a mailako ket pakairaman ti wombok nga aggatad iti ₱35 ti tunggal maysa kilo, repolio nga aggatad iti ₱15 iti kada kilo wenno ₱75 para iti lima a kilo, ken patatas nga aggatad iti ₱60 iti kada kilo. Direkta nga inlako dagiti mannalon ken supplier manipud Benguet ti produktoda tapno makaasidegda kadagiti gumatang ken maliklikan ti nangato a dagdag presio iti merkado.
Segun kadagiti aglaklako, panggep da a matulongan dagiti mannalon a mangilako a dagus kadagiti apitda bayat a maikkan ti publiko iti gundaway a gumatang iti presko, de kalidad, ken nalaka a nateng.
Dakkel met ti maitulong ti direkta a panaggatang iti agtultuloy a panagbiag dagiti mannalon, nangruna iti baet ti umad-adu a gastos iti produksion ken transportasion dagiti produkto ti agrikultura.
Kabayatanna, maiparegta ti publiko a gundawayanda daytoy ken gumatang bayat nga adda pay laeng umdas a suplay ti nateng para iti pamilia wenno para iti pagbiag da. (Report by Bombo Ericka)
