LA UNION – Kinumpirma ti Overseas Workers Welfare Administration nga adda ti maala ti pamilya ti Overseas Filipino Worker a nag-suicide idiay HongKong a pinansyal a tulong manipud iti nasao nga opisina.
Daytoy ti inbatad ni Mrs. Virna Agbayani, agdama a Welfare Unit Head ti Overseas Workers Welfare Administration Region 1 kalpasan a pimmusay ni Rozeny Diane Acosta, agtawen ti 27, addaan ti dua nga annak ken residente iti Barangay Cantoria 3, Luna,La Union.
Basar iti inisyal a report, kineltay ni Acosta ti biag na gapu iti maipagarop a problema na seknan iti karelasyon na, no sadinno nga agpapan ita ket saan pay a maakseptar ti pamilya na ti napasamak.
Naammuan pay a kalpasan ti napasamak nga insidente ket nagturong a dagus ti kabsat ti biktima iti opisina ti Overseas Welfare Worker Administration tapno dumawat ti tulong ken maiyawiden ti bangkay ni Acosta.
Gapu iti daytoy, ket inpasigurado met ti Overseas Workers Welfare Administration, a mannarimaanen ti proseso ti pannaka-iyawid ti bangkay na inton Abril 27 ken ipaayan da ti pamilya ni Acosta ti one hundred thousand pesos a tulong pinansial nangruna iti naulilana a dua a minor de edad nga annakna, twenty thousand pesos met ti burial assistance, kasta pay nga impasigurado da ti educational assistance nga ipaay da kadagiti annak ni Acosta iti kada tawen, no sadinno a 5,000 pesos no elementarya, 8,000 pesos apaman ti panag-hayskul da, ken 10,000 inton ag-kolehiyo da
Malaksid iti daytoy ket adda pay ipaay ti OWWA a 15,000 nga agserbi kas livelihood assistant iti ina ti biktima ken sabali pay a pinansyal a tulong manipud iti agency ni Acosta.
Immun-una iti daytoy ket inpasigurado metten ti employer ni Acosta nga isuda ti mangibaklay iti magastos iti pannaka-iyawid ken iti mansayag na agingga a maitabon.
Kabayatanna, nagpalagip manen ni Agbayani kadagiti OFw a no makapapspasar da iti problema ket saan da nga agpang-dua-dua a tumawag iti opisina da.
