LA UNION – Agtultuloy pay laeng iti imbestigasyon ti pulisya maipapan iti panangbiktima ti text scammer iti maysa a misis idiay ili ti Sto. Tomas, La Union.
Nabigbig ti 59-anyos a biktima a ni Luzviminda Avilla, residente ti Barangay Casilagan ti nasao nga ili.
Iti pannakiuman ti Bombo Radyo kennni SPO1 Ignacia Daz Estrada, chief investigator ti Sto. Tomas Police Station, kinunana a naallukoy ti biktima a mangted iti kwarta nga agbalor ti P100,000 a kiniddaw ti suspek kalpasan a makaawat daytoy iti text message a nangabak iti P750,000 cash manipud iti nagpabigbig nga Atty. Mike Lopez ti0 Villar Foundation.
Kayanon a mangmangted iti kwarta ti misis gapu iti namnama a masukatan daytoy ti dakdakkel a kantidad babaen iti inabakna a premyo.
Iti kamaudiananna ket nautobna nga inallilaw isuna ti suspek gapu ta saanna a naala ti nasao a premyo a napangabakanna iti electronic raffle.
Kabaytanna, agparparang iti inisyal nga imbestigasyon sigun kenni Estrada, a maysa a Marlix Alvares iti immawat ti kwarta nga impatulod ti biktima babaen ti money remmittance center idiay Samal Island idiay probinsya ti Davao Del Norte.
Nakikoordinar metten ti Sto. Tomas Police iti Anti-Cyber Crime Unit tapno mabigbig ken matiliw ti suspek. (Abs Flores)
