Nagpakdaar dagiti grupo ti mannalon iti manamnama a pannakalugi a dumanon ti ₱12 billion iti sektor ti agrikultura, apaman nga ituloy ti gobierno iti singasing a naan-anay nga ikkaten iti taripa kadagiti maang-angkat a mais.
Pormal a nangidatag ti nainget a panangkontra iti Federation of Free Farmers (FFF) ken MAGSASAKA Party-list kontra kadagitoy nga addang.
Segun kenni FFF Board Chairman Leonardo Montemayor, nupay panggep ti singasing nga ibaba iti presyo ti baboy ken manok iti tengnga ti krisis iti enerhiya, napalaus a maapektaran iti pagbiagan dagiti lokal nga agimulmula ti mais.
Imballaag ti grupo a no bumagsak iti farm grate price, posible a mapilitan iti kagudua dagiti mannalon nga isardengen iti produksion.
Impaganetget ni Montemayor a saan a nakailintegan iti nasao nga addang, agsipudta maibasar iti panagadal-da, awan pay ti maysa porsyento a manamnama a panagbaba iti retail price dagiti karne.
Bassit unay iti epekto daytoy kadagiti consumers maiyarig iti binilyon a piso a mapukaw kadagiti lokal a mannalon.
Iti agraraira a sistema iti agdama, mapatawan ti lima agingga 15% a taripa dagiti amin a corn imports a sumsumrek ditoy pagilian.
Maibasar iti kauddian a datos, adda iti 60% laeng ti pakabuklan a supply ti mais iti pagilian nga aggapo iti lokal a produktion, bayat nga iti nabatbati ket maang-angkat iti sabali a pagilian.
Kas alternatibo a solusyon, impaganetget ti FFF ken MAGSASAKA Party-list a saan a rumbeng nga ipasa ti dadagsen kadagiti agimulmula ti mais.
Pinaregtada iti gobierno a mangiganuat ti direkta a tulong para kadagiti hog ken poultry raisers babaen ti panangipaay ti nalaklaka a farm input.###
