LA UNION – Gapu iti mapaspasaran a kinabara ti panyempo, nainget a sipsiputan ita ti Bureau of Fisheries and Aquatic Resources (BFAR) Regional Office-1 dagiti insidente ti fish kill kadagiti pagtartarakenan iti lames ditoy Ilocos region.
Iti pannakiuman ti Bombo Radyo La Union kenni BFAR Regional Office-1 Director Segundina Gaerlan, kinunana nga adda dagiti nailistada a fish kill idiay paset iti Pangasinan ken Ilocos Sur kadagiti napalabas nga aldaw.
Sigun kenni Gaerlan, iti isaysayangkatda a monitoring kadagiti dadduma pay a lugar iti rehiyon tapno ammuen no adda pay ti napasamak a fish kill wenno pannakatay dagiti lames.
Base iti kaudian a datos ti BFAR Regional Office-1, mapatta-patta a P12 million a balor iti pannakaappog dagiti lames nga apektado ti fish kill iti Ilocos region.
Kabayatanna, awan ti nailista nga insidente ti fish kill iti La Union.
Imbatad ni La Union Provincial Agriculture Office – Fishery Unit Chief Leony Gagni, nga awan pay ti naireport iti opisinada a fish kill ngem adda met minimal a nailistada a mortality.
Imbalakad iti opisyal kadagiti agtartaraken nga apitendan dagiti dadduma a a lames dagitoy tapno maippaayan met ti umdas nga oxygen dagiti mabati a taraken.
Inlawlawag ni Gagni, maysa kadagiti makagapu iti pannakatay dagiti lames ket no bigla a ngumato ti temperatura ken mapasarunnuan iti killaat a panagbuyat ti tudo nga isu ti rason ti panagbaba iti suplay ti oxygen nga ar-aramaten dagiti taraken tapno makaanges.
Impalagip ti opisyal nga no adda ti tumpuar nga insidente iti fish kill ket nasken a maiyunan daytoy iti municipal agriculture office tapno maipaayan dagitoy ti ayuda nga agtaud manipud ti gobyerno.
