LA UNION – Inuram ken dinadael dagiti otoridad iti nasurok 10,000 a pidaso ti fully grown marijuana ken mapatta-patta nga agbalor ti P2.2 M kabayatan ti naisayangkat a ceremonial burning (May 10) iti La Union Police Provincial Office (LUPPO) iti Camp Diego Silang, Barangay Carlatan, San Fernando City, La Union.
Dagiti nauram a pinuon ti marijuana ket manipud iti operasyon ti joint composite teams iti Phil. National Police idi napan a lawas iti boundary dispute ti Barangay Tubaday Santol, La Union ken Barangay Caoayan Sugpon, Ilocos Sur.
Iti operasyon ket naisayangkat iti dua a disso.
Iti umuna a plantation site ti marijuana nga aglawa ti 1,000 sqm ket nakakumpiskar dagiti otoridad iti 6,000 pidaso ti fully grown marijuana (agtayag ti 4-12 ft.) ken agbalor ti P1.2 million bayat nga iti maikadwa a site nga aglawa met laeng ti 1,000 sqm ket nakakumpiskar dagiti otoridad ti 5,000 pidaso ti fully grown marijuana, a mapatta-patta nga agbalor ti P1-M.
Daytoy ket paset iti agtultuloy a kampanya ti PNP ken PDEA kontra illegal drugs ken panangkamat kadagiti cultivators ti marijuana.
Impaganetget ni PCol. Jonathan Calixto, agdama a Police Provincial Director, kabayatan ti panagbetla na, nga addan-to met laeng aldaw a panag-pullo dagiti marijuana cultivators, a masansan a makalibas kabayatan ti marijuana eradication ti PNP .
