LA UNION – Umabuten iti P2.4 million ti balor ti nadadael iti sektor iti agrikultura idiay probinsya ti La Union gapu iti awan sarday a panagtudtudo idi napalpalabas nga aldaw a gubuay iti Southwest monsoon wenno nepnep.
Base iti inisyal a report ti Office of the Provincial Agriculture (OPAG), aganay P2,466,339 ti nasayang a kapagayan, natnateng ken dagiti taraken a lames.
Manipud ti nasao a kantidad, dumanon iti P1,003,339 a balor ti nailista a perdisyon manipud iti 193 nga ektarya a kapagayan.
P574,000 iti balor ti nadadael a natnateng a naimula iti 3.30 nga ektarya a daga, kabayatan a P889,000 ti nailista a balor iti napukaw manipud kadagiti pagtarakenan iti lames.
Posible a ngumato iti kantidad dagiti napirdi a produkto a pang-agrikultura gapu ta saan pay a nakasangpet dagiti daddama nga evaluation report iti OPAG nga agtaud manipud kadagiti naduma-duma a munisipyo.
Immunan nga impanamnama ti nasao nga opisina nga adda iti maipaay a tulong iti lokal a gobyerno kadagiti mannalon a nakaro a naapektaran ti pagsapulanda gapu iti idadalapus ti kalamidad.
