SAN FERNANDO, LA UNION – Agtultuloy ti isaysayangkat nga imbestigasyon dagiti kameng ti Bureau of Fire Protection (BFP) iti napasamak nga uram iti maysa nga stock room idiay Lower Sunrise Subdivision ti Barangay Pagdaraoan, syudad ti San Fernando, La Union, agarup alas-12:30 itay parbangon, May 21.
Iti interview ti Bombo Radyo La Union kenni SFO1 Sherwin Dela Peña, Arson Investigator ti San Fernando City Fire Station, kinunana nga immabot ti first alarm ti uram ken naideklara a fire out agarup ala-1:32 itattay laeng parbangon.
Karaman kadagiti nauram ket dagiti case a naglaon ti softdrinks ken beer; motor ken private tricycle.
Sigun pay kenni Dela Peña, dati daytoy a pagtaengan a kukua ti managan Domingo Soriano ngem inaramidda laengen daytoy nga stock room iti maysa nga store a banbantayan ni Simon Mostoles.
Awan met ti nadangran iti nadakamat nga insidente.
Mapatta patta nga umabot ti P200,000 ti balor dagiti nauram a banag.
Dukduktalen met dagiti otoridad ti nagtaudan ti uram.
