LA UNION – Umabot iti nasurok a P200 million ti inisyal a balor iti kapagayan ti nadadael gapu ti panangdalapus iti bagyo Ompong idiay probinsya ti La Union.
Iti pannakiuman ti Bombo Radyo kenni La Union Provincial Disaster Risk Reduction and Management Office (PDRRMO) Operations Officer Alvin Cruz, kinunana a mabalin a ngumato pay ti nasao a kantidad gapu ta agtultuloy iti ar-aramiden nga assestment dagiti municipal agriculturist kadagiti bukodda a lugar.
Panggep met nga irekomenda ti PDRRMO iti La Union Provincial Board a maideklara kas state of calamity ti inetero a probinsya.
Iti sabali a bangir, naammuan ti Bombo Radyo nga idiay ili ti San Juan, La Union ket madama iti assesment ti lokal a gobyerno kaddua dagiti sumagmamano a kameng ti Department of Agriculture kadagiti kapagayan ken namnamaen a maiteden iti benepisyo dagiti mannalon na nag-avail iti crop insurance.
Kabayatanna, nangbukelen iti Rapid Damage Assestment and Analysis Team ti Office of Civil Defense (OCD) a mang-validate kadagiti lugar a dinalapos ti bagyo.
Kinuna ni OCD Regional Center-1 Spokeperson Mike Sabado, ti nasao a team ket bukbuklen iti kameng a nagtaud kadagiti naduma-duma nga ahensya ti gobyerno.
Babaen iti daytoy ket mapapartak iti panagkalap ti data wenno impormasyon ken maammuan a dagus dagiti pagkasapulan a nasken a kiddawen manipud iti national government.
Namnamaen nga aglippas inton aldaw ti Byernes wenno mas nasapsapa pay ti validation ti nasao a grupo.
