LA UNION – Mangnamnama ni San Fernando City, La Union Mayor Hermenegildo ‘Dong’ Gualberto a paboran a dagus iti City Development Council ti kanayunan a pondo para iti paggatang ti COVID-19 vaccine.
Immunan a kinumpirma ti alkalde nga addan iti inisyal a pondo a P21 million manipud iti savings ti gobyerno-syudad ti San Fernando a nailatang para ti panaggatang iti nasao a bakuna.
Sigun kenni Gualberto, saan nga umanay ti nadakamat a kantidad gapu iti kinaadu ti agindeg iti syudad a mabakunaan kontra iti COVID-19.
Gapu ta saan a nairaman iti 2021 proposed budget iti city government ti panaggatang iti bakuna ket isapulanda daytoy ti kanayunan a pondo wenno maidalan iti supplemental appropriation babaen ti konseho iti syudad.
Kinuna pay ni Gualberto, manarimaan itan ti panangisagana iti listaan dagiti prayoridad a maipaayan ti COVID-19 vaccine a maiyannurot iti agbalin a pagallagadan ti national government.
