LA UNION – Bayat nga umas-asidegen iti holiday season wenno paskua, nakatuding met a mangisayangkat iti panagbisita ken inspection iti naduma-duma a pagtagilakwan kadagiti christmas lights ken christmas decors, iti enforcement team ti Department of Trade and Industry (DTI) La Union.
Segun kenni Chief Trade and Industry Development Specialist Marissa Nonesa, importante iti isayangkat da nga inspeksiyon kadagiti establisimento iti intero probinsiya, tapno masiguro a natalged iti gatangen a produkto dagiti konsyumer ken maiyadayo dagitoy iti peligro a patauden dagiti substandard a christmas lights ken christmas decor.
Dagiti produkto ket nasken nga addaan iti PS Mark wenno ICC sticker, agsipudta dagitoy a marka iti pakakitaan a dimmalan dagiti produkto iti safety evaluation.
Malaksid dayta, nasken pay a masiguro nga authentic wenno pudno dagiti nasao a marka ken sticker, a saan ketdi a peke.
Dagiti produkto a saan a dumalan iti quality standards ket mabalin a makaapektar iti salun-at dagiti makasabidong a kemikal wenno mangigubway ti peligro kas koma iti uram.
Impaganetget ni Nonesa a dagiti mapaneknekan a negosyante nga agilako iti substandard a chrisrmas lights/decors ket mamulta iti saan a bumaba ti P25,000.
