LA UNION – Agtultuloy iti imbestigasyon ti pulisya maipapan iti panangserrek ti agtatakaw manipud iti balay ti maysa a doktor kasaruno iti panangitaray kadagiti naduma-duma a kita iti electronic gudgets ken kwarta daytoy idiay Barangay Cabaritan Sur, ili ti Naguilian, La Union.
Nabigbig ti biktima a ni Dr. Anthony Jane Cereno, residente ti nasao a lugar.
Base ti imbestigasyon ti Naguilian Police Station, nasangpetan laengen ti biktima a nakalukat ti balay ken naduktalanna a mapukpukaw dagiti lima a laptop, maysa a digital camera ken kwartana nga agbalor iti P2,750.
Iti pakabuklan, umabot iti amin a mapukpukaw nga alikamen iti P250,000.
Agparparang met iti imbestigasyon ti pulisya a maipagarup a dinadael ti suspek ti tawa ken ruangan ti balay a nagpaay a dalan dagitoy.
