LA UNION – Nangipaulog iti lokal a gobyerno idiay Rosario, La Union iti maysa nga ordinansa maipapan kadagiti allagaden a rumbeng a suruten dagiti agpasada a tricycle drivers ita a nakapasidong iti General Community Quarantine (GCQ) iti probinsiya.

Nakailanad iti Ordinance No. 6 series of 2020 a napaulwan iti An Ordinance Implementing a Temporary Odd- Even Scheme for Tricycles Operating Within the Territorial Jurisdiction of Rosario, La Union During the General Community Quarantine and Providing Penalty to Violators Thereof.

Kayatna sawen, daytoy ket panangiyemplementar ti temporaryo nga odd even scheme para kadagiti pampasahero a traysikel kabuyog metten dagiti allagaden a nasken nga aramiden iti driver ken pasahero.

Dagiti addaan ti body number nga agleppas iti 135, 7, ken 9 ket mapalubosan laeng nga agpasada tunggal aldaw ti Lunes, Miyerkoles, ken Biyernes bayat nga iti 0246 ken 8 ket mabalin da laeng ti agbiyahe tunggal Martes, Huwebes, ken Sabado.

Dadduma pay nga allagaden a rumbeng a suruten iti driver ken pasahero:

  • panagusar ti face mask iti driver ken pasahero
  • panagsuot ti gloves
  • ken maysa laeng iti rumbeng a pasahero ti traysikel
  • nairut a maipatungpal iti no mask no ride policy ken
  • nasken nga agtungpal iti naituding a curfew hour malaksid laeng dagiti barangay service vehicles

Dagiti maipataw a multa kadagiti aglabsing iti ordinansa ken iti inaramid a fare matrix ti Rosario-LGU:

  • P2,500 nu awan ti face mask iti driver ken pasahero
  • P500 fine ken makanselar ti prangkisa iti traysikel a saan a sumurot iti fare matrix
  • P500 nu awan ti plastic divider iti traysikel
  • P500 a multa kadagiti saan a mangsurot iti odd even scheme ken
  • P500 nu agpili ti pasahero na iti driver ken naglabes ti siningir a plete base iti fare matrix

Naipaganetget pay nga iti siasinuman kadagiti pampubliko a lugar, a maaktuan nga awan ti face mask na wenno anyaman a pang-akkob iti rupa ken mamulta ti P2,500.00 ken/wenno mabalud ti 12 nga oras.

Uray dagiti aglabsing iti Physical Distancing idiay Rosario La Union ket adda kaibatugan na a pannusa.