Imbilin ni Presidente Ferdinand “Bongbong” Marcos Jr. iti panangiruar ti pakabuklan a ₱321 million a pondo para kadagiti 34 a probinsia ken walo a siudad a dinuprak ti Bagyo Basyang ken ti Shear Line.
Naipatulod iti direktiba kenni Executive Secretary Ralph G. Recto, a nangipanamnama iti napartak a pannakairuar ti tulong pinansial kadagiti apektado a Local Government Units (LGUs).
Segun ti Presidente, dagiti naglabas a dakes a panawen ket nangigubuay ti mass evacuations, pannakatay dagiti saan a bumaba ti 12 a tattao, segun ti Office of Civil Defense, ken nakaro a pannakadadael kadagiti imprastruktura.
Kinuna ni Recto a mausar iti pondo para iti rehabilitasyon dagiti nadadael nga estruktura ken tulong kadagiti residente a napukawan ti pagtaengan.
Paset daytoy iti gannuat ti Presidente a papartaken iti panagbangon dagiti komunidad manipud iti kalamidad.
Karaman kadagiti makaawat ti tulong dagiti probinsia idiay Mindanao kas iti Surigao del Sur, Surigao del Norte, Dinagat Islands, Agusan del Norte, Agusan del Sur, Misamis Oriental, Misamis Occidental, Lanao del Norte, Davao de Oro, Davao del Norte, Bukidnon, Camiguin, ken Zamboanga del Norte.
Idiay Visayas, Negros Oriental, Negros Occidental, Bohol, Capiz, Aklan, Leyte, Cebu, Iloilo, Eastern Samar, Southern Leyte, Antique, Siquijor, Samar, ken Northern Samar.
Ditoy Luzon, Catanduanes, Camarines Sur, Sorsogon, Masbate, Camarines Norte, Occidental Mindoro, ken Oriental Mindoro.
Dagiti walo a siyudad met a makaawat ti ayuda ket ti Iligan, Cagayan de Oro, Bacolod, Butuan, Cebu City, Zamboanga City, Iloilo City, ken Mandaue City.
Malaksid iti pondo, imbilin pay ni PBBM iti nalawa a river clearing operations ken flood mitigation measures tapno malapdan ti panaglayos iti masakbayan.
Kagiddan daytoy, indauluan pay ti Presidente iti panagpirma ti Memorandum of Agreement (MOA) iti nagbaetan ti Department of Education ken provincial LGUs para iti dakkel a classroom building program iti intero a pagilian.###
