LA UNION – Nasurok a P36.1 million iti kwarta a naited kas tulong iti 3rd batch dagiti hograisers a naapektaran iti panagraira iti African swine fever (ASF) iti Ilocos Region.
Iti pannakiuman ti Bombo Radyo kenni Dr. Alfiero Banaag ti Department of Agriculture (DA) Regional Office-1 Focal Person, kinunana a sipud idi bulan ti Pebrero ket dumanonen iti 1,069 a benepisaryo iti nakaawaten iti nasao a tulong kadagiti probinsiya ti Pangasinan ken La Union.
Manipud iti nadakamat a kantidad, P35.2 million iti inawat dagiti hograisers idiay Pangasinan, kabayatan nga P825,000 kadagiti agtartaraken iti baboy ti La Union.
Tunggal baboy a nairaman iti culling operation ket nabaloran iti P5,000.
Naammuan pay manipud iti nadakamat nga opisina, manarimaan iti panangiproseso kadagiti dadduma pay a dokumento para ti maited a tulong kadagiti dadduma nga apektado a hograisers gapu ti ASF.
