LA UNION – Nangidiaya ti pamilya Fabricante iti aganay P50,000 a reward para iti siasinuman a makaited ti impormasyon tapno matunton iti mapukpukaw a mangngalap a ni Jefferson Fabricante alyas “Ip-ip”, nabiag man wenno natayen.
Iti pannakiuman ti Bombo Radyo kenni Marybel Fabricante manipud Bani, Pangasinan, kinunana a tumultulong payen dagiti dadduma a mangngalap a mangsapol kenni Jefferson, ngem agingga ita ket saan pay a nasarakan.
Iti nasao a reward ket agtaud mismo iti pamilya Fabricante ken babaen ti kari a tulong iti maysa a gayyem da manipud China.
Kabayatanna, inlawlawag ni Lt. Jaypee Abuan, spokesman ti Naval Forces Northern Luzon (NFNL), nga ituloy da koma iti search operation iti mapukpukaw a mangngalap ngem gaputi pangta iti bagyo Ulysses ket naitantan daytoy.
Maipalagip a nagpataaw ni Ip-Ip idi Nobyembre 2 kadwa na iti dadduma a mangngalap, ngem isuna laeng ti saan a nakasubli iti simmaruno nga aldaw, Nobyembre 3.
Nasurok maysa lawas itan ti napalabas ngem mangnamnama latta iti pamilya Fabricante a masarakan da iti bagi ni Jefferson.
