Nakatuding nga umawat ti kabaruan a pammadayaw ni boxing legend ken People’s Champ Manny Pacquiao kalpasan a naiwaragawag nga isuna ket agbalin a paset ti Class of 2027 ti U.S. National Boxing Hall of Fame.
Kinumpirma ni Eric Schmidt ti nasao nga anunsio ti 3rd Pacquiao-Elorde Awards Night a naangay idiay Manila.
Sakbay daytoy ket paset ni Pacquiao iti International Hall of Fame Class of 2025 Canastota, New York kadua dagiti padana a Filipino boxing greats nga isuda Gabriel Elorde ken Pancho Villa.
Mabigbigbig ni Pacquiao kas kakaisuna nga 8 division world champion iti pakasaritaan ti boxing, addaan ti 12 major world titles, ken nakalaban iti 22 world champions ti pakabuklan ti karerana.
Iti surat a naggapu ti National Hall of fame, naitudo ni Pacquiao kas “Main Event” inductee para ti Class of 2027.
Dinayaw pay ti kontribusyonna iti boxing karaman iti serbisyona iti pagilian.
Manamnama a makipaset ni Pacquiao iti induction ceremony a maangay inton Abril 25, 2027 idiay Quiet Cannon Montebello, California.
