LA UNION – Adda itan iti salwad ti Provincial Environment and Natural Resources Office (PENRO) – La Union ti pag-ong a nabanniitan ti maysa a residente idiay karayan ti Barangay Caoayan, ili ti Burgos, La Union.
Iti pannakiuman ti Bombo Radyo kenni Camilo Quezada, ti nakatiliw iti nasao a pag-ong, kinunana a nakillaat daytoy idi a mapanna sangaten ti banniit nga impakatna idiay karayan.
Immuna nga impagarup ni Quezada a napagasatan daytoy a nakabanniit iti dakkel a lames ti karayan ngem maysa gayam a pag-ong ti natiliwna.
Inkagumaanna nga ikkaten ti sima a kinagat ti nasao nga ayup ngem napaay isuna gapu ti kinauyong daytoy.
Nagkamang ni Quezda iti Bombo Radyo tapno maisalbar ti pag-ong nga aksidente a nabanniitanna iti karayan.
Daytoy iti maikaddua a pag-ong a natiliw ti nadakamat a residente iti nasao a karayan nga iti umuna ket idi nga adda ti nasagat iti impakanna nga screen ngem imbulosna met laeng.
Kabayatanna, kinumpirma ti PENRO a maysa a kita iti soft shell turtle ti nabanniitan ni Quezada.
