Mamati ni House Speaker Faustino “Bojie” Dy III a rumbeng nga agserbi kas inspirasion iti 2026 Palarong Pambansa tapno makaallukoy kadagiti agtutubo a Pilipino nga agarapaap ken agregget.
Iti mensahena para iti nasional a paay-ayam a maangay manipud Mayo 24 agingga 31 idiay Prosperidad, Agusan del Sur, imbaga ni Dy a napateg iti sports iti panangsukog ti disiplina, kinatibker, ken leadership ti agtutubo.
Impaganetget na nga iti Palarong Pambansa ket saan laeng a laban para iti medalya no di ket maysa met a panagrambak ti kinagaget, sakripisio, teamwork, ken kinaanos dagiti atleta nga estudyante manipud kadagiti nadumaduma a paset ti pagilian.
Segun kenni Dy, nangabaken amin a nakipaset gapu iti dedikasion ken panagregget tapno makadanon iti pangpagilian nga ay-ayam.
Pinaregtana met dagiti atleta a lumaban nga addaan ti integridad ken dayaw bayat nga ibagbagi iti pagadalan, komunida, ken rehiyon.###
