LA UNION – Adda 20 dagiti archers iti La Union a pakaibilanganda Shanylle Samson ken Rogelene Faith Arellano ti Bacnotan National High School, ti sumabak iti archery event ti Palarong Pambansa 2018 idiay Ilocos Sur.
Iti pannakiuman ti Bombo Radyo La Union kenni Coach Jigger Paragas, kinuna nga agtultuloy ti nainget nga ensanyoda ken panagsagana para iti umadani a kompetisyon.
Inaklon na a ti nainget a kalabanda iti archery ket dagiti atleta manipud iti Dumaguete, Region 3 ken NCR gaputa nakaiyawiden dagitoy ti adun a medalya iti napalabas a Palarong Pambansa.
Naamuan a da Samson ken Arellano ket umuna a gundaway a makipaset iti kadakkelan nga sporting event iti pagilian.
Nupay kasta, nangabak metten dagitoy iti dadduma a national ken international sports competitions.
Innayon pay ni Paragas nga adda kabuklan a 600 delegado ti mangibagi iti sibubukel a Region 1 para iti Palarong Pambansa 2018.
