Nagkedked nga agkomento iti Malacañang mainaig iti nagbalin a banat ni Batangas 1st District Representative Leandro Leviste a ti Pilipinas ket addan iti sidong ti “de facto martial law”.
Sigun ken ni Palace Press Officer Claire Castro, saan nga amin a biddut nga opinion ket maikari a sungbatan ti palasio.
Daytoy ket kalpasan ti pannakairuar ti video ni Leviste a mangibagbaga a target ti administrasion a makasuan dagiti mangibutbutaktak ti korapsion.
Inlawlawag ti Malacañang nga agtalinaed a silulukat iti gobierno iti kritisismo, ken agtultuloy nga adda dagiti indibidual a sipapanayag a mangbabbabalaw ken mangar-aramid ti akusasion kontra ti Presidente.
Nupay kasta, inlawlawag ni Castro nga iti laksid dagiti naawatda a kritisismo, saan a mangipila ti kaso iri presidente kadagiti kritikona.
Impaganetget met ti palasio a no adda man ti makasuan ket gapu daytoy iti panagsarita wenno panaggunay a mailabsing iti linteg.###
