LA UNION – Naminsan manen a natakawan ti maysa a pagadalan idiay ili ti Pugo, La Union.
Maibasar iti inisial nga imbestigasion ti Pugo Police Station, sinerrek dagiti saan pay a nabigbig nga agtatakaw ti principal’s office, ken siled pagadalan ti grade 2 ken grade 4 iti Palina Elementary School.
Karaman kadagiti natakaw ket ti maysa a laptop, biometrics machine, flat screen TV, maysa a tablet ken cellphone.
Maipalagip nga idi Mayo 4 ita met laeng a tawen ket natakawan manen ti nasao a pagadalan a nakaitarayan ti nasurok P70,000 a balor dagiti computer units.
Agtultuloy ita ti nainget nga imbestigasion dagiti otoridad iti nasao nga insidente.
