LA UNION – Impalawag ni Major Rogelio Miedes, hepe ti Bauang Police Station, a saan a gandat a panagtakaw iti ranta ti suspek a nangbagsol iti 71-anyos a baket idiay Barangay Central West, ili ti Bauang, La Union.
Sigun kenni Major Miedes, maysa a lalaki nga addaan ti deperensya iti panunot ti immatake iti biktima a ni lola Estella Bumatay kabayatan nga adda daytoy iti balayna idi rabii.
Ti nasao a suspek a ni Avelino Estepa, 22, ket impulong iti kabsatna gapu iti inaramid daytoy a kinadamsak isu a nakabaluden iti kwerpo ti pulisya.
Kinuna ni Major Miedes, nabartek ti suspek idi nga inatake na ti biktima.
Kabayatanna, natalgeden ken adda ita ti balayna ti nadakamat a lola kalpasan a maagasan ti bassit a sugatna iti ospital.
Innayon pay ni major Miedes, awan iti kinapudno ti maipadadamag ita iti social media a ginandat ti suspek a takwan ti kwarta nga inawat ti lola manipud iti social amelioration program gapu ta saan daytoy a nailista kas benepisyaryo.
Gapu ta agmamaysa laengen ti biktima iti balayna ket innakkan metten ti pulisya daytoy iti tulong wenno relief goods.
