Nagyaman ni Leyte 1st district Representative Ferdinand Martin Romualdez ti maminsan manen a panangitag-ay ni Pambansang Kamao Manny Pacquiao iti bandera ti Pilipinas iti sangalubongan nga entablado.
Daitoy ti mensahe Representative Romualdez kasaruno, ti panagsubli manen ti 46-anyos a Manny Pacquiao iti boxing ring nga ibilbilang na balligi kasaruno ti laban na kontra iti naub-ubing a WBC Welterweight Champion a ni Mario Barrios.
Kinuna ni Romualdez a maipannakkel ti Pilipino ti naimaldit ti pakasaritaan ni Pacquiao, ti kalakayan a limmaban iti boxing, nangabak pay kuma iti welterweight championship ngem nadesisyonan laeng dagiti judges nga itabla iti laban.
Kabayatanna, napalaos met ti panagbilib ni Zambales 1st District Representative Jay Khonghun ti awan kupas a laing ti bokxing iti Pambansang Kamao.
Segun kenni Konghun, nupay “majority draw” iti laban da Pacquiao ken Barrios ket nalawag nga impamatmat ni Manny iti awan katupag a kapadasan, kinapartak, ken kinaandur iti rabaw ti boxing ring.
Innayon na nga ado a fans ken boxing experts ti mamati a ni Pacquiao iti nakalamang iti laban, maibasar metten ti kinaadu ken kaledad dagiti inyebbat na a danog ken kombinasyon.
Kinunana pay nga impakita ni Pacquiao a tured ken disiplina ti pudno a mangipapaay ti inspirasyon kadagiti Pilipino ti intero a lubong, nangruna kadagiti agtutubo nga tarigagay a mapagballaigian dagiti karit iti biag.
