LUNA, La Union — Naballigi iti pannakabagi ti Luna iti Search for Pride Advocacy Queen of Elyu 2026 a naangay idi Hulio 4 iti Francisco I. Ortega Convention Center ditoy Siudad ti San Fernando, La Union.
Nagserbi ti pageant kas espesial a panagpatingga ti maysa bulan a selebrasion para ti LGBTQIA+ community iti probinsia kas panangbigbig iti adbokasia, talento, ken kontribusionda iti komunidad.
Iti mensahe nga indanon ni Governor Mario Eduardo C. Ortega babaen ken ni Provincial Administrator Dr. Ramon B. Torres, inyebkasna iti suporta ti Gobierno Probinsial iti naballigi a pannakaipatungpal ti programa. Dimmar-ay met isuda Board Member Alyssa Sibuma, Ex-Officio Board Member Harold Dave Sibuma, ken sumagmamano a mayor manipud iti nadumaduma nga ili.
Inpakita dagiti kandidata ti kinapintasda iti swimsuit ken evening gown competitions, bayat a nangipaay dagiti drag performers nga isuda Mother Le Mouth, Gusholina, Snow Black, ken Euzene iti naisangsangayan a pabuya.
Kalpasan ti Question and Answer portion, nagballigi iti Luna kas Pride Advocacy Queen of Elyu 2026. Naala met ti Agoo iti titulo kas first runner-up, idinto a second runner-up iti San Juan.###
