LA UNION – Saanen a maipursige ti kaso maikontra iti freezer van driver a nakadungpar iti tallo a tattao ken nakatayan iti 16-anyos a barito idiay Pugo, La Union.
Kinuna iti Bombo Radyo La Union ni PCapt. Nestor Juanbe, agdama a hepe ti Pugo Police Station, naki-areglo iti pamilya ti biktima a ni Jericho Baylosis iti respondent driver a ni Diosdado Urbano, 35, a taga Laoac, Pangasinan.
Base iti napagnumwan ti dua a benneg iti sango ti Pugo Police Station, ibaklay ti driver iti burial assistance ken aminen a gastos ti pamilya ti biktima, ket umabot iti P130,000 iti bayadan ni Urbano.
Malaksid pay daytoy iti sabali a tulong na kadagiti dua a mannalon a nadun-dunor iti nasao nga insidente.
Maipalagip a bumallasiw koma iti kalsada iti biktima kadwa na iti dua a nataengan a mannalon, da Bayani dela Cruz ken Diosdado Dulay idi madungpar da ti man-manehuen a freezer van ni Urbano.
Dead on-the-spot ni Baylosis kalpasan a nagsagaba ti nakaru a pannakadun-dunor iti napasamak nga aksidente iti kawatiwatan ti Pugo-Rosario highway, sakop ti Barangay San Luis, Pugo, La Union.
Maipalagip a rimuar iti imbestigasyon dagiti otoridad a ginandat ti respondent driver nga ag-overtake iti nagmenor a pampasahero a bus tapno ilugan iti bus inspector, ngem maipagarop a na-lost control iti manibela a puon ti nakadungparan na kadagiti biktima.
