BR LA UNION – Imbabawi ti pamilya ti napatay a policewoman a ni Diane Marie Mollenido ti reklamo a robbery with homicide ken theft kontra iti sigud nga asawa na a ni Police Senior Master Sergeant John Mollenido.
Maibasar iti minutes ti inquest proceedings idiay Quezon City Prosecutor’s Office, ni Daisie Gabres, kabsat ti biktima, iti nangidatag ti mosyon tapno ibabawi ti reklamo kontra kenni Mollenido.
Kinumpirma ni Quezon City Police District Director Col. Randy Glenn Silvio ti naiyatras a reklamo, a nagbalin a rason tapno ruk-atan ti inquest prosecutor ni Mollenido .
Nupay kasta, inlawlawag ni Silvio nga agtultuloy latta ti imbestigasyon ti pulisya.
Innayonna a maipasidong iti cyber warrant ti gadget ni Mollenido tapno maamiris dagiti aktibidadna.
Nakaragsakan met daytoy iti abogado ni Mollenido a ni Atty. Cristobal Rimando, ket kinunana a pammaneknek ti panagatras iti kaawan ti ebidensiya a mangi-konektar iti kliyente iti napasamak a krimen.
Iti laksid a naiyatras ti reklamo, agtalinaed ni Mollenido iti restrictive custody ti National Capital Region Police Office (NCRPO) bayat a ti sabali a reklamo nga obstrucion of justice ken maysa nga administrative investigation.
Segun kenni Atty. Rimando, awan pay ti naawat da a kopya ti reklamo nga obstruction of justice, ken impaganetget na a naiyawat iti kliyente na ti bangkay ti asawa na, dua nga aldaw kalpasan a masarakan idi Enero 24.
