Pinasingkedan ti Department of Justice nga imbestigaranda ni Senador Mark Villar maipanggep iti koneksionna iti kontratista a naipaayan ti proyekto idiay Las Pinas, kasaruno iti naidanon nga impormasion a konektadoda iti kontraktor ken addaan ti maipagarop a ‘conflict of interest’.
Segun kenni Justice Secretary Jesus Crispin ‘boying’ Remulla, maibasar iti naawat da nga impormasion, maipagarop a kasinsin ni Senador Villar wenno ‘First Cousin’ na iti kontrakista.
Dumalan met iti nasao nga impormasion ti beripikasion ken ebalwasyon agsipud ta saan met a direkta a naggapo iti ahensia tapno maaramat kuma kas ebidensia.
Mapattapatta a dumanon ti nasurok 18.5 billion pesos iti nagun-od nga infrastructure projects ti kontratista a nainaig iti senador.
Innayon ni Justice Secretary Remulla, saan laeng a limitado kenni Senador Mark Villar iti imbestigasion no di ket karaman pay da Senador Camille ken ni sigud a Senador Cynthia Villar.
Kitkitaen ti DOJ iti ‘related interest’ wenno iti umuna agingga maikatlo a tukad ti consanguinity.
Kabayatanna, inbinglay ni Justice Secretary Remulla nga dagiti maim-imbestigaran a proyekto ket saan laeng a flood control no di ket karaman dagiti nadumaduma a klase ti infrastructure projects.
Nupay kasta, inawis ti sekretario ni Senador Mark Villar tapno maaddaan ti komunikasion iti nagbaetan da ti departamento.###
