Nasaksian dagiti nadumaduma a wagas ti panagrambak ita a Valentine’s Day, Pebrero 14, ditoy San Fernando City a saan laeng a dagiti agayan-ayat ti makumikom nga agselebrar no di ket pati pay dagiti pamilia a nangpili a mangbusbos iti naisangsangayan nga aldaw a kaduada dagiti ay-ayatenda.
Adu nga agayan-ayat ken agtutubo ti kadawyan nga agsagana para ita nga Aldaw ti Puso babaen ti panangisagut iti sabong, tsokolate, ken mangan iti ruar. Nupay kasta, para iti dadduma, ad-adda a mapatibker iti espiritu ti ayat iti uneg ti pamilia.
Maysa kadagiti nainterview ti Bombo Radyo La Union ket ni Alyssa Leah Bachiller ken kaduana ti asawa ken anakna iti plaza ti San Fernando.
Segun kenkuana, pinilida a selebraran ti Valentine’s Day babaen ti pannanganda iti ruar ken panangbusbosda iti panawen a kas maysa a sibubukel ken naragsak a pamilia.
Kinunana a kapatgan iti amin ti pamilia kadagiti aniaman a material a banag.
Inbinglay na pay a kalpasan ti dandani sangapulo ket maysa a tawen a panagdenna kas agassawa, agtaltalinaed a natibker iti relasionda gapu iti natibker a pammatida iti Dios ken agtultuloy a panangawat iti tunggal maysa.
Innayon ni Bachiller a napateg iti silulukat ken umno a komunikasion tapno agtalinaed a natibker iti relasion ken iti intero a pamilia.
“Ti komunikasion ti tulbek iti relasion ken agtalinaed a natibker dagiti pamilia,” kenuna ni Bachiller.
Kas mensahe para iti daytoy nga Aldaw dagiti Puso, imbinglayna ti maysa a bersikulo manipud iti Biblia, Juan 3:16, a kunana: “Ta ti Dios inayatna unay ti lubong nga intedna ti bugbugtong nga Anakna, tapno ti siasinoman a mamati Kenkuana saan a mapukaw no di ket maaddaan iti biag nga agnanayon.”
Iti laksid dagiti nadumaduma a wagas ti panagrambak, agtalinaed a nalawag iti kaadduan a ti pudno nga espiritu ti Valentine’s Day ket saan laeng a nakapamaysa iti romansa, no di ket iti panangipateg, ayat, ken panagkaykaysa ti pamilia.###
