Nakipamaysa ni Presidente Ferdinand R. Marcos Jr. iti Muslim community iti intero a lubong iti panangrambak ti Eid’l Adha wenno Feast of Sacrifice.
Iti mensahe ti presidente, kinunana nga ipalpalagip ti Eid’l Adha iti kinapateg ti napigsa a pammati, panagtulnog iti pagayatan ni Allah, ken panagtalek iti nangatngato a panggep para iti pada a tao.
Segun kenni Presidente Marcos, isursuro ti nasantoan a selebrasion nga iti animan a sakripisyo ket saan a pulos a masayang para iti umno, nainkalintegan, ken nadayaw a panggep.
Impaganetgetna pay a ti Eid’l Adha ket maysa a palagip nga ipaigid iti personal nga interes ken patanoren iti kinapakumbaba, debosion, ken panangisakit.
Mangnamnama nga agserbi iti selebrasion a kas inspirasion tapno ad-adda a mapatibker iti panagkaykaysa ken panangipateg a mangisilpo iti tunggal Pilipino kas maymaysa a pagilian.###
