LA UNION – Nangrugin ti panagbakuna kontra measles-rubella ken oral polio vaccination ditoy probinsiya iti La Union ken ditoy syudad iti San Fernando.
Ditoy syudad ti San Fernando, kinuna ni City Health Officer Dr. Arman Carrera, a dumanon iti mapatta patta nga 11,223 ti bilang dagiti ubbing edad lima agpababa iti target a maipaayan iti Measles-rubella ken oral polio vaccine.
Kabayatanna, kas panangsuporta ni City Mayor Alf Ortega iti programa ti DOH, inallokoy na dagiti nagannak nga ipabakuna dagiti ubbing kadagiti naituding a petsa iti panagbakuna iti bukod dagitoy a barangay tapno agbalin dagitoy a natalged kontra kadagiti nadakamat a sakit.
Immunan a naipasiguro nga iti panagturong dagiti nagannak ken ubbing kadagiti brgy. hall ket nainget latta a masurot iti minimum public health standards kas preventive measure iti sakit a COVID 19.
Kabayatanna, iti intero a probinsiya ti La Union, dumanon iti nasurok 100,000 nga ubbing nga agtawen ti 5 agpababa iti target ti Provincial Health Office (PHO) a mabakunaan para iti phase 1 ti Measles-rubella ken oral polio vaccine.
Manipud iti nasao a bilang, nasurok 61-k dagiti manamnama a mabakunaan iti measles-rubella bayat a 71,241 iti polio vaccine.
Maipatpatungpal ti Phase 1 iti panagbakuna manipud Oktubre 26 agingga Nobyembre 25, 2020.
Karaman ti Ilocos Region iti Phase 1 iti panagbakuna kontra measles-rubella ken polio.
