BR LA UNION – Kinontra ti Presidential Anti-Organized Crime Commission iti maipagarop a panagbalin a ‘balat sibuyas’ ti sumagmamano nga opisyal ti Local Government Units (LGU) a maim-imbestigaran gapu iti iligal a Philippine Offshore Gaming Operations (POGO) iti masakopan da a lugar.
Gaputi dayta, binalakadan mismo ti agdama a tagapagsarita ti komisyon a ni Spokesperson Winston Casio dagitoy a liklikan ti agbalin nga arsagid iti isay-sayangkat da a ‘motu proprio’ investigations.
Kinuna na a pasensiya laengen kadagiti mayor ti sumagmamano a lokal a gobyerno ken inallokoy na dagitoy a saan a dagus a mangirwar ti statement nangruna nu madakamat dagitoy a karaman iti plano a maimbestigaran.
Maipalagip nga itay kallabes ket nagsasaruno iti insayangkat a raid kadagiti POGO hubs idiay siyudad ti Paranaque ken Pasay.
Kabayatanna, impaganetget ni Spokesperson Winston Casio a saan a sakop ti komisyon iti imbestigasyon kadagiti mayor ken dadduma pay nga opisyal, iti posible a koneksyon da iti iligal nga operasyon ti POGO.
Inlawlawag na, iti Department of the Interior and Local Government ti maka-ammo a mangimbestigar iti nasao nga isyu.
Mainaig ti daytoy, impaganetget ti opisyal a pagsungbaten da amin a karaman iti operasyon dagiti nasao nga iligal nga aramid.
Kinuna na pay nga uray Pilipino dagiti suspek, awan ti rason tapno saan a maaresto ken pagsungbaten ti komisyon.
