BR LA UNION – Parikot ita dagiti aglaklako ti agricultural supply idiay ili ti Bauang iti nakapsot a panaglakwan gaputa karaman da nga apektado iti panagngato ti presyo dagiti abono, insektisidiyo ken gasolina, ken pakaap-apektaran pay iti panagmula dagiti mannalon.
Segun kenni Jocelyn Hernandez, dakkel ti ngimmatuan dagiti ilaklako da a produkto gapu iti nangina a presyo ti gasolina ken agricultural supplies.
Kinuna ni Hernandez, iti kadawyan a gat-gatangen dagiti mannalon ket insecticides ken abono.
Ita a bulan ti Mayo, adu koman ti aggatang ti abono para iti planting season sakbay ti tiyempo ti panagtutudo, ngem gapu iti nangato a presyo, madlawan da a nakapsot wenno bassit dagiti aggatang.
Imbaga pay ni Hernandez a nu awan ti aggatang ti abono, maapektaran met ti panaglako da iti insektisidiyo.
Iti agdama, ti presyo ti sulfate ket 1,550 pesos kada sako, dandani doble ti ngimmatuanna nu ikumpara idi napalabas a tawen nga 850 pesos laeng.
Ti urea ken complete fertilizer ket agbalor itan ti 3,000 pesos kada sako, manipud iti sigud a 1,800 agingga 1,900 pesos idi umuna a paset ti tawen.
