Nakapsot pay laeng ti panaglakwan iti christmas decors, christmas lights, lantern, gift wrap, ken dadduma nga item nga adda pakainaiganna iti paskua nupay nasurok 40 nga aldaw laengen ti nabatbati sakbay iti kaaldawan ti paskua.
Iti pannakiuman ti Bombo Radyo kenni Precy Javillonar manipud iti maysa a puwesto idiay Bauang Commercial Complex, inladawanna a sumagmamano pay laeng ti gumat-gatang idinto a nakaad-adu dagiti tagilako a naka display ken stock-da.
Kinunana a maysa kadagiti posible a rason iti daytoy ket ti panag-salimetmet dagiti tattao ken ipangpangrunada ti aggatang kadagiti kangrunaan a kasapulan kumpara kadagiti nasao a dekorasyon.
No maipapan iti presyo dagiti Christmas lights, daytoy ket mangrugi iti ₱280 agingga iti ₱350, depende iti kadakkel ken klase dagitoy, no solar-powered wenno LED christmas lights.
Segun kenni Javillonar, saan da nga ingato iti presyo dagiti tagilako da tapno saan a nadagsen ken manayunan ti gastos dagiti kostumer.
Kinuna na pay a posible nga ad-adda laeng a marigatanda nga aglako no patungan da pay ti presyo dagiti tagilakoda.
